சினிமா

எல்லையில் காதல்! தேர்தலுக்கு மறுநாள் ரிலீஸாகும் "கமாண்டோவின் லவ் ஸ்டோரி"!

எல்லையைப் பாதுகாக்கும் கமாண்டோவின் இதயத்தில் காதல்! ஏப்ரல் 24-ல் வெளியாகும் 'கமாண்டோவின் லவ் ஸ்டோரி'!

சென்னை:

தமிழ் சினிமாவில் அவ்வப்போது ராணுவ வீரர்களின் வீரத்தைச் சொல்லும் படங்கள் வருவதுண்டு. ஆனால், ஒரு கமாண்டோவின் வாழ்வில் மலரும் அழகான மற்றும் வித்தியாசமான காதல் கதையைப் பேசத் தயாராகிவிட்டது "கமாண்டோவின் லவ் ஸ்டோரி". ஏ.ஏ.ஏ. பிக்சர்ஸ் சார்பில் அனுராதா அன்பரசு தயாரித்துள்ள இந்தப் படம், வரும் ஏப்ரல் 24-ம் தேதி ரிலீஸாக உள்ளது.

மல்டி டேலன்ட் வீர அன்பரசு

இந்தப் படத்தின் கதை, திரைக்கதை, வசனம் எழுதி இயக்கியுள்ளதோடு, நாயகனாகவும் நடித்துள்ளார் வீர அன்பரசு. இவருக்கு ஜோடியாக மும்பை அழகி ஏஞ்சல் கதாநாயகியாக அறிமுகமாகிறார். இவர்களுடன் ரோபோ சங்கர், பப்லு பிரித்விராஜ், பேரரசு, அரவிந்தராஜ், விஜய டிவி முல்லை, பாலு ஆனந்த் உள்ளிட்ட ஒரு பெரிய நட்சத்திரப் பட்டாளமே இதில் இணைந்துள்ளது.

கார்த்திக் ராஜாவின் இசை

பாவலர் வரதராஜனின் புதல்வர் சிவராமன் இசையமைக்க, பிரபல இசையமைப்பாளர் கார்த்திக் ராஜா பின்னணி இசை அமைத்துள்ளார். இசைஞானி இளையராஜாவின் வாரிசுகள் இந்தப் படத்தில் இணைந்துள்ளது படத்தின் மீதான எதிர்பார்ப்பை அதிகப்படுத்தியுள்ளது. வில்லியம்ஸ் ஒளிப்பதிவு செய்துள்ளார்.

ரிஸ்க்கான படப்பிடிப்பு - ஜவ்வாது மலையில் ஒரு திரில்!

படம் குறித்து இயக்குநர் வீர அன்பரசு கூறுகையில், "எல்லையைப் பாதுகாக்கும் ஒரு வீரனின் வாழ்வில் வரும் காதலை மையப்படுத்தி, எதார்த்தமான முறையில் இந்தப் படத்தை எடுத்துள்ளோம். மணாலி, கோவா, மகாபலிபுரம் மற்றும் ஜவ்வாது மலை போன்ற இடங்களில் படப்பிடிப்பு நடந்துள்ளது.

குறிப்பாக, ஜவ்வாது மலையில் உள்ள பீமா நீர்வீழ்ச்சிக்குக் கீழ் உள்ள ஆழமான பள்ளத்தாக்கில், சுற்றுலாப் பயணிகளுக்கே அனுமதி இல்லாத இடத்தில் மிகவும் ரிஸ்க்காகப் படப்பிடிப்பு நடத்தினோம். மாலையில் படப்பிடிப்பு முடிந்ததும் யூனிட் ஆட்களை மேலே அனுப்பிவிட்டு, கேமரா உபகரணங்களை எடுக்க முடியாமல் மறுநாள் காலை வரை அங்கேயே தங்கியிருந்தது மறக்க முடியாத திரில் அனுபவம்" என்றார்.

ஏப்ரல் 24 ரிலீஸ்

சட்டமன்றத் தேர்தல் முடிந்த கையோடு, வரும் ஏப்ரல் 24-ம் தேதி இந்தப் படத்தை ரிலீஸ் செய்யப் படக்குழு திட்டமிட்டுள்ளது. ஒரு கமாண்டோவின் காதல் எப்படி இருக்கும் என்பதைத் திரையில் காண ரசிகர்கள் ஆவலுடன் காத்திருக்கின்றனர்.