சூலூர் 10 வயது சிறுமி கொடூர கொலை: தப்ப முயன்ற அரக்கன் கார்த்திக்கிற்கு கை, கால் முறிவு!

கோவையில் பதைபதைப்பு: 10 வயது சிறுமி கொடூரக் கொலை - தப்பியோட முயன்ற 'அரக்கன்' கார்த்திக்கிற்கு கை, கால் முறிவு!

- அறிக்கை: செய்தியாளர் அன்பழகன்

கோயம்புத்தூர் மாவட்டம் சூலூர் அருகே உள்ள பள்ளப்பாளையம் பகுதியில் 10 வயது சிறுமி கொடூரமான முறையில் கொலை செய்யப்பட்டு சடலமாக மீட்கப்பட்ட சம்பவம் ஒட்டுமொத்த தமிழகத்தையும் அதிர்ச்சியில் உறைய வைத்துள்ளது. பிஞ்சு குழந்தைக்கு நேர்ந்த இந்த கொடூரமும், அதைத் தொடர்ந்து நடந்த குற்றவாளிகளின் கைதும், பொதுமக்களின் போராட்டமும் கோவை மாவட்டத்தையே பதற்றத்தின் உச்சத்திற்கு கொண்டு சென்றுள்ளது.

காணாமல் போன சிறுமி... சடலமாக மீட்பு

சூலூர் அடுத்த பள்ளப்பாளையம் பகுதியைச் சேர்ந்த அந்த 10 வயது சிறுமி, கடந்த 21ஆம் தேதி மாலை வழக்கம் போல் தனது வீட்டின் அருகே விளையாடிக் கொண்டிருந்தார். நேரம் செல்லச் செல்ல சிறுமி வீடு திரும்பாததால் பதற்றமடைந்த பெற்றோர், அக்கம் பக்கம் என பல இடங்களில் தேடியுள்ளனர். எங்கும் சிறுமி கிடைக்காத நிலையில், உடனடியாக சூலூர் காவல் நிலையத்தில் புகார் அளித்தனர்.

நேற்று முழுவதும் பெற்றோர் மற்றும் காவல்துறையினர் தீவிரமாகத் தேடி வந்த நிலையில், நேற்று மாலை பள்ளப்பாளையம் பகுதியிலேயே அந்த சிறுமி நெஞ்சை உலுக்கும் வகையில் சடலமாக மீட்கப்பட்டார். சிறுமியின் உடலில் பல்வேறு இடங்களில் கடுமையான காயங்கள் இருந்ததைக் கண்டு பெற்றோரும், அப்பகுதி மக்களும் கதறி அழுதனர். உடனடியாக சிறுமியின் உடலைக் கைப்பற்றிய காவல்துறையினர், அதனை சிங்காநல்லூர் இ.எஸ்.ஐ (ESI) மருத்துவமனைக்கு பிரேதப் பரிசோதனைக்காக அனுப்பி வைத்தனர்.

சிசிடிவி காட்டிக்கொடுத்த உண்மை... குற்றவாளிகள் கைது

இந்த கொடூரச் சம்பவம் தொடர்பாக சூலூர் காவல்துறையினர் உடனடியாக களத்தில் இறங்கி விசாரணையைத் முடுக்கிவிட்டனர். அப்பகுதியில் பொருத்தப்பட்டிருந்த சிசிடிவி கேமரா பதிவுகளை ஆய்வு செய்தபோது, ஒரு நபர் இருசக்கர வாகனத்தில் அந்தச் சிறுமியை அழைத்துச் சென்றதும், பின்னர் சிறுமி சடலமாக மீட்கப்பட்ட பகுதியில் அந்த நபர் சந்தேகத்திற்கு இடமான வகையில் உலா வந்ததும் பதிவாகி இருந்தது.

இந்த முக்கிய ஆதாரத்தின் அடிப்படையில், அந்தப் பகுதியைச் சேர்ந்த 33 வயதான கார்த்திக் என்பவரை போலீசார் சுற்றிவளைத்துப் பிடித்தனர். நாகப்பட்டினம் மாவட்டத்தைச் சேர்ந்த இவர், போலீசாரிடம் நடத்தப்பட்ட கிடுக்கிப்பிடி விசாரணையில், சிறுமியைக் கொலை செய்ததை ஒப்புக்கொண்டு பகீர் வாக்குமூலம் அளித்துள்ளார். மேலும், இந்தக் குற்றத்திற்கு உடந்தையாக இருந்த மோகன்ராஜ் என்பவரையும் போலீசார் உடனடியாக கைது செய்துள்ளனர்.

தப்பியோட முயற்சி... கை, கால் முறிந்த அரக்கன்

கைது செய்யப்பட்ட கார்த்திக்கை, கொலை நடந்த இடத்திற்கு நேரில் அழைத்துச் சென்று போலீசார் விசாரணை மேற்கொண்டனர். அப்போது, எதிர்பாராத விதமாக அங்கிருந்த ஒரு கட்டிடத்தின் மீது ஏறி குதித்து கார்த்திக் தப்பியோட முயன்றுள்ளான். மாடியில் இருந்து கீழே விழுந்ததில், கார்த்திக்கின் வலது கை மற்றும் வலது கால் முறிந்தது.

உடலிலும் பலத்த காயம் ஏற்பட்டதையடுத்து, அவனைப் பிடித்த காவல்துறையினர், உடனடியாக கோவை அரசு மருத்துவமனைக்கு சிகிச்சைக்காக அழைத்துச் சென்றனர். தற்போது அவன் அங்கு போலீஸ் பாதுகாப்புடன் தீவிர சிகிச்சை பெற்று வருகிறான்.

விடிய விடிய கொந்தளித்த மக்கள்... நெடுஞ்சாலை மறியல்

சிறுமியின் படுகொலைச் செய்தி காட்டுத்தீயாய் பரவியதும், ஆத்திரமடைந்த 500-க்கும் மேற்பட்ட பொதுமக்கள் சூலூர் காவல் நிலையம் முன்பும், திருச்சி - கோவை தேசிய நெடுஞ்சாலையிலும் திரண்டு விடிய விடிய சாலை மறியல் போராட்டத்தில் ஈடுபட்டனர். நள்ளிரவில் நடந்த இந்த மாபெரும் போராட்டத்தால் பல கிலோமீட்டர் தூரத்திற்கு போக்குவரத்து முடங்கியது.

சூழ்நிலையின் தீவிரத்தை உணர்ந்த மேற்கு மண்டல ஐஜி மற்றும் மாவட்ட காவல் கண்காணிப்பாளர் (SP) பவன் குமார் ரெட்டி ஆகியோர் சம்பவ இடத்திற்கு விரைந்து வந்து நள்ளிரவு 3 மணி வரை பொதுமக்களிடம் பேச்சுவார்த்தை நடத்தினர். "குற்றவாளிகளான கார்த்திக் மற்றும் மோகன்ராஜ் ஆகிய இருவரையும் 24 மணி நேரத்திற்குள் கைது செய்துள்ளோம். நீங்கள் போராட்டத்தைக் கைவிட்டால் மட்டுமே அடுத்தகட்ட சட்ட நடவடிக்கைகளைத் துரிதமாக எடுக்க முடியும்," என உறுதி அளித்த பின்னரே பொதுமக்கள் போராட்டத்தைக் கைவிட்டனர்.

மருத்துவ அறிக்கைக்காக காத்திருக்கும் காவல்துறை... பாயுமா போக்சோ?

சிங்காநல்லூர் இ.எஸ்.ஐ மருத்துவமனையில் சிறுமியின் உடல் இன்று காலை 10 மணிக்கு பிரேதப் பரிசோதனை முடிந்து பெற்றோரிடம் ஒப்படைக்கப்பட உள்ளது.

இதுகுறித்து மாவட்ட காவல் கண்காணிப்பாளர் கூறுகையில், "முதற்கட்டமாக கடத்தல் மற்றும் கொலை ஆகிய பிரிவுகளின் கீழ் வழக்கு பதிவு செய்யப்பட்டுள்ளது. பிரேதப் பரிசோதனை மற்றும் மருத்துவ அறிக்கையில் சிறுமி பாலியல் வன்கொடுமைக்கு ஆளானது உறுதி செய்யப்பட்டால், குற்றவாளிகள் மீது உடனடியாக போக்சோ (POCSO) சட்டம் பாயும். கார்த்திக் ஏற்கனவே பாலியல் ரீதியாகத் துன்புறுத்தியதாக வாய்மொழியாக ஒப்புக்கொண்டுள்ளான், இருப்பினும் மருத்துவ அறிக்கைக்காகக் காத்திருக்கிறோம்," எனத் தெரிவித்தார்.

அறிவியல் பூர்வமான விசாரணை தீவிரம்

வழக்கமான விசாரணைகளைத் தாண்டி, இந்த வழக்கில் அறிவியல் பூர்வமான ஆதாரங்களைத் திரட்டுவதில் தனிப்படைகள் தீவிரமாக ஈடுபட்டுள்ளன. சிசிடிவி பதிவுகள் மட்டுமின்றி, குற்றவாளிகளின் செல்போன் உரையாடல்கள், சம்பவத்தின் போது அவர்கள் இருந்த செல்போன் கோபுர இருப்பிடம் (Tower Location) உள்ளிட்ட டிஜிட்டல் ஆவணங்களும் முக்கிய சாட்சிகளாக வழக்கின் கோப்பில் இணைக்கப்பட்டு வருகின்றன.

"இந்த கொடூரக் குற்றத்தில் தொடர்புடையவர்கள் யாராக இருந்தாலும், அவர்களுக்குத் தகுந்த தண்டனை பெற்றுத் தருவது உறுதி" என காவல்துறை தரப்பில் சூளுரைக்கப்பட்டுள்ளது. பதற்றமான சூழல் நிலவுவதால் கோவையின் புறநகர் பகுதிகள் மற்றும் சூலூர் பகுதிகளில் நூற்றுக்கணக்கான போலீசார் குவிக்கப்பட்டு பாதுகாப்பு பலப்படுத்தப்பட்டுள்ளது.

இந்த வழக்கின் அடுத்தகட்ட நகர்வுகள், நீதிமன்ற நடவடிக்கைகள் மற்றும் விரிவான அரசியல் செய்திகளை உடனுக்குடன் தெரிந்துகொள்ள செய்தித்தளம்.காம் (Seithithalam.com) இணையதளத்தை தொடர்ந்து படியுங்கள்.