"பழனிசாமியை மொத்தமாக உட்கார வைப்போம்" - உதயநிதி அதிரடிப் பேச்சு!

"டெல்லி அணி vs தமிழ்நாடு அணி... கேப்டன் ஸ்டாலின் தான்!" - ராயபுரத்தில் எடப்பாடியை வறுத்தெடுத்த உதயநிதி!

தமிழக சட்டமன்றத் தேர்தல் களம் நாளுக்கு நாள் அனல் பறந்து வரும் நிலையில், திமுக மற்றும் அதிமுக இடையே நேரடி மோதல் உச்சக்கட்டத்தை எட்டியுள்ளது. குறிப்பாக, திமுகவின் நட்சத்திரப் பேச்சாளரும், துணை முதல்வருமான உதயநிதி ஸ்டாலின் மாநிலம் முழுவதும் சூறாவளிப் பிரச்சாரம் மேற்கொண்டு வருகிறார். அந்த வகையில், சென்னை ராயபுரம் தொகுதியில் திமுக வேட்பாளர் சுபேர்கான் அவர்களுக்கு ஆதரவாக உதயநிதி ஸ்டாலின் ஆற்றிய உரை அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

ராயபுரம் மேம்பாட்டுத் திட்டங்கள்

பிரச்சாரத்தின் தொடக்கத்தில் ராயபுரம் தொகுதிக்காக திமுக அரசு செய்துள்ள திட்டங்களைப் பட்டியலிட்ட உதயநிதி, குறிப்பாக காசிமேடு மீன்பிடி துறைமுகத்தை 100 கோடி ரூபாய் மதிப்பீட்டில் மேம்படுத்தியுள்ளதைச் சுட்டிக்காட்டினார். "சொன்னதைச் செய்யும் அரசு இது, அந்த உரிமையோடுதான் உங்களிடம் மீண்டும் வாக்குக் கேட்க வந்திருக்கிறோம்" என்று அவர் பேசினார்.

எடப்பாடிக்கு "மொத்த தோல்வி" பட்டம்

எதிர்க்கட்சித் தலைவர் எடப்பாடி பழனிசாமியை "மொத்த தோல்வி பழனிசாமி" என்று புதிய பெயரிட்டு அழைத்த உதயநிதி, கடந்த கால தேர்தல்களில் அவர் சந்தித்த தோல்விகளை நினைவு கூர்ந்தார். "ஏற்கனவே 10 தோல்விகளைச் சந்தித்த பழனிசாமியை, இந்தத் தேர்தலில் மொத்தமாகத் தோல்வியடையச் செய்து வீட்டில் உட்கார வைப்போம்" என்று அவர் ஆவேசமாகத் தெரிவித்தார்.

"காலில் விழுந்தது" குறித்த கிண்டல்

சமீபத்தில் எடப்பாடி பழனிசாமி ஒரு பேட்டியில், "பதவி கொடுத்ததால் நன்றிக்காகக் காலில் விழுந்தேன், அதில் என்ன தவறு?" என்று கேட்டிருந்தார். இதற்குப் பதிலடி கொடுத்த உதயநிதி, "சரி, பதவி கொடுத்தார்கள் என்பதற்காகக் காலில் விழுந்தீர்கள், ஆனால் அதன் பிறகு அந்த அம்மாவுக்கே (சசிகலா) காலை வாரிவிட்டது ஏன்? காலில் விழுந்து பதவி வாங்கிவிட்டு, அவரையே காட்டி கொடுத்த அனுபவம் எடப்பாடிக்கே உரியது" என்று சாடினார்.

முரட்டு அடிமை விமர்சனம்

"மோடி தான் இந்தியாவிலேயே வலிமையான நபர்" என்று எடப்பாடி பழனிசாமி பேசியதைச் சுட்டிக்காட்டிய உதயநிதி, "மோடியின் நம்பர் ஒன் முரட்டு அடிமை எடப்பாடி பழனிசாமி தான் என்பதை அவரே ஒத்துக்கொண்டார். அதிமுக என்பது இப்போது பாஜகவின் ஒரு அங்கமாகவே மாறிவிட்டது" என்று குற்றம் சாட்டினார்.

டெல்லி அணி vs தமிழ்நாடு அணி

2026 சட்டமன்றத் தேர்தலை ஒரு கிரிக்கெட் போட்டியோடு ஒப்பிட்டுப் பேசிய உதயநிதி, "இந்தத் தேர்தல் டெல்லி அணிக்கும் தமிழ்நாடு அணிக்கும் இடையிலான போட்டி. தமிழ்நாடு அணிக்கு நம்முடைய முதலமைச்சர் ஸ்டாலின் தான் கேப்டன். டெல்லி அணிக்கு மோடி கேப்டன், அவரது அடிமை எடப்பாடி பழனிசாமி தான் அந்த அணியின் வீரர். சுயமரியாதை மிக்கத் தமிழகம் ஒருபோதும் டெல்லிக்கு அடிமையாகாது" என்று முழங்கினார்.

சிறுபான்மையினரின் காவல் அரண்

இறுதியாக, சிறுபான்மையின மக்களுக்கு திமுக என்றும் பாதுகாப்பாக இருக்கும் என்று உறுதியளித்தார். 2019-ல் சிஏஏ (CAA) சட்டத்திற்கு எதிராக முதன்முதலில் வீதிக்கு வந்து போராடித் தான் கைது செய்யப்பட்டதை நினைவு கூர்ந்த அவர், ராயபுரம் தொகுதி வேட்பாளர் சுபேர்கானை அதிக வாக்குகள் வித்தியாசத்தில் வெற்றி பெறச் செய்யுமாறு பொதுமக்களிடம் வேண்டுகோள் விடுத்தார்.