நாளை முதல் மக்கள்தொகை கணக்கெடுப்பு லிவ்-இன் ஜோடிகளுக்கு 'தம்பதி' அந்தஸ்து - மத்திய அரசு அதிரடி!

இந்தியாவின் முதல் டிஜிட்டல் மக்கள்தொகை கணக்கெடுப்பு (Census 2026) நாளை, ஏப்ரல் 1, 2026 முதல் நாடு முழுவதும் தொடங்குகிறது. இதற்காக மத்திய அரசு வெளியிட்டுள்ள அதிகாரப்பூர்வ கேள்வி-பதில் (FAQs) பகுதியில், சமூக மாற்றங்களை அங்கீகரிக்கும் வகையில் ஒரு முக்கிய அறிவிப்பு இடம்பெற்றுள்ளது. அதன்படி, திருமணமாகாமல் ஒரே வீட்டில் வாழும் 'லிவ்-இன்' (Live-in) ஜோடிகள் தங்களை தம்பதிகளாகக் கணக்கில் காட்டிக்கொள்ள அனுமதி வழங்கப்பட்டுள்ளது.

லிவ்-இன் ஜோடிகளுக்கான விதிமுறைகள்

கணக்கெடுப்புப் படிவத்தில் "திருமணமான தம்பதிகள்" குறித்த கேள்விகளுக்குப் பதிலளிக்கும்போது, லிவ்-இன் உறவில் இருப்பவர்கள் தங்களைக் கணவன் - மனைவியாகக் குறிப்பிடலாம். இதற்கு எவ்வித திருமணச் சான்றிதழோ அல்லது சட்டப்பூர்வ ஆவணங்களோ தேவையில்லை எனத் தெரிவிக்கப்பட்டுள்ளது.

• நிபந்தனை: சம்பந்தப்பட்ட ஜோடிகள் தங்களது உறவை ஒரு "நிலையான ஒன்றியம்" (Stable Union) என்று கருதினால் மட்டுமே அவர்களைத் தம்பதிகளாகக் கணக்கிட வேண்டும் என அதிகாரிகள் அறிவுறுத்தப்பட்டுள்ளனர்.

• நோக்கம்: ஒரு குடும்பத்தின் கட்டமைப்பு, தங்கியிருக்கும் வசதி மற்றும் பொருளாதாரத் தேவைகளைத் துல்லியமாகக் கணக்கிட இந்த நடைமுறை உதவும் என அரசு விளக்கமளித்துள்ளது.

முதல் கட்டத்தில் கேட்கப்படும் 33 கேள்விகள்

நாளை தொடங்கும் முதற்கட்டக் கணக்கெடுப்பில் (Houselisting and Housing Census) வீட்டின் தரம் மற்றும் வசதிகள் குறித்து 33 கேள்விகள் கேட்கப்படும். அதில் முக்கியமானவை:

1. வீட்டின் தரை, சுவர் மற்றும் கூரை எதனால் ஆனது?

2. குடும்பத்தில் உள்ள தம்பதிகளின் எண்ணிக்கை எவ்வளவு?

3. வீட்டுத் தலைவர் யார்? (ஆண்/பெண்/திருநங்கை யாராக வேண்டுமானாலும் இருக்கலாம்).

4. வீட்டில் பயன்படுத்தப்படும் தானிய வகை என்ன?

5. குடிநீர் வசதி மற்றும் வாகன வசதிகள் (சைக்கிள் முதல் கார் வரை).

6. ஸ்மார்ட்போன் மற்றும் இணைய வசதி உள்ளதா?

சுய கணக்கெடுப்பு முறை (Self-Enumeration)

இந்த முறை வரலாற்றிலேயே முதன்முறையாக மக்கள் தங்களது தகவல்களைத் தாங்களே இணையதளம் (Self-enumeration portal) வழியாகப் பதிவு செய்யும் வசதி அறிமுகப்படுத்தப்பட்டுள்ளது. இதற்கான போர்ட்டல் இன்று முதல் செயல்பாட்டிற்கு வந்துள்ளது. இதன் மூலம் மக்கள் தங்கள் வீடுகளில் இருந்தே தகவல்களைப் பதிவு செய்துவிட்டு, கணக்கெடுப்பு அதிகாரி வரும்போது அதற்கான 'Reference Number'-ஐ மட்டும் காட்டினால் போதுமானது.