நீட் தேர்வு எதிரொலி: கூகுள் பிளே ஸ்டோரில் இருந்து டெலிகிராம் ஆப் தற்காலிக நீக்கம்!

இந்தியாவில் மருத்துவப் படிப்புகளுக்கான நீட் நுழைவுத் தேர்வில் (NEET-UG) தொடர்ச்சியாக எழுந்து வரும் வினாத்தாள் கசிவு குற்றச்சாட்டுகளை அடுத்து, மத்திய அரசும் தேசிய தேர்வு முகமையும் (NTA) பல்வேறு முன்னெச்சரிக்கை நடவடிக்கைகளை தீவிரமாக எடுத்து வருகின்றன. இதன் ஒரு முக்கிய பகுதியாக, டெலிகிராம் செயலியில் இயங்கி வரும் கல்வி மோசடி கும்பல்களைக் கட்டுப்படுத்த மத்திய அரசு இந்த அதிரடி நடவடிக்கையை மேற்கொண்டுள்ளது.

அரசாங்கத்தின் உத்தரவைத் தொடர்ந்து, கூகுள் நிறுவனம் தனது பிளே ஸ்டோரில் இருந்து டெலிகிராம் செயலியை தற்காலிகமாக நீக்கியுள்ளது. இதனால், ஆண்ட்ராய்டு போன் பயனர்கள் புதிதாக டெலிகிராம் செயலியை தரவிறக்கம் செய்ய முற்பட்டால், "இந்த ஆப் தற்போது கிடைக்கவில்லை" (This app is not available) என்ற செய்தி திரையில் காட்டப்படுகிறது. ஆப்பிள் நிறுவனமும் தனது ஆப் ஸ்டோரில் (App Store) இருந்து டெலிகிராமை விரைவில் நீக்கும் எனத் தகவல் வெளியாகியுள்ளது. ஏற்கனவே செயலியை தரவிறக்கம் செய்துள்ள பயனர்களும் புதிய சேனல்களில் இணைவதிலோ அல்லது செயலியை பயன்படுத்துவதிலோ தடங்கல்களைச் சந்திக்கலாம்.

சமீபகாலமாக, "PAPER LEAKED NEET", "Re-NEET 2026" போன்ற பெயர்களில் இயங்கும் பல டெலிகிராம் சேனல்கள், மாணவர்களின் அச்சத்தை சாதகமாகப் பயன்படுத்தி லட்சக்கணக்கில் பணம் பறிக்கும் செயல்களில் ஈடுபட்டு வந்தன. அகமதாபாத் சைபர் கிரைம் மற்றும் பீகார் காவல்துறையின் பொருளாதார குற்றப்பிரிவு ஆகியவை இதுபோன்ற பல டெலிகிராம் சேனல்களை முடக்கியுள்ளன.

இந்த நடவடிக்கை பல சாதாரண பயனர்களுக்கும், சிறு வணிகர்களுக்கும் தற்காலிக சிரமத்தை ஏற்படுத்தியிருந்தாலும், லட்சக்கணக்கான மாணவர்களின் எதிர்காலத்தைக் கருத்தில் கொண்டும், தேர்வின் நேர்மையைக் காக்கவும் இந்த நடவடிக்கை மிக அவசியமானது என தேசிய தேர்வு முகமை (NTA) விளக்கம் அளித்துள்ளது. மாணவர்கள் மற்றும் பெற்றோர்கள் சமூக வலைதளங்களில் பரவும் எந்தவொரு வதந்தியையும் நம்ப வேண்டாம் என அறிவுறுத்தப்பட்டுள்ளது.