திமுக ஆட்சியில் 43 அணைகள்!" , மாமல்லன் நீர்த்தேக்கத்திற்கு அடிக்கல்!

"அணைகளே கட்டலையா? லிஸ்ட் இருக்கு பாருங்க!" - 43 அணைகளைப் பட்டியலிட்டு எதிர்க்கட்சிகளை வாயடைக்க வைத்த முதல்வர் ஸ்டாலின்!

சென்னை/செங்கல்பட்டு: "திமுக ஆட்சியில் புதிய அணைகளே கட்டப்படவில்லை என்று சிலர் திட்டமிட்டுப் பொய் பிரச்சாரம் செய்து வருகின்றனர். அவர்களுக்கான பதில் இதோ..." என்று கூறி, திமுக ஆட்சிக்காலத்தில் கட்டப்பட்ட 43 அணைகளின் பட்டியலை மேடையில் வாசித்து அதிரடி காட்டியுள்ளார் முதலமைச்சர் மு.க. ஸ்டாலின்.

சென்னை மாநகரின் குடிநீர் தேவையைப் பூர்த்தி செய்யும் வகையில், செங்கல்பட்டு மாவட்டம் நெம்மேலியில் அமையவுள்ள புதிய 'மாமல்லன் நீர்த்தேக்கத்திற்கு' (Mamallan Reservoir) அடிக்கல் நாட்டு விழா நேற்று (ஜனவரி 19) நடைபெற்றது. இவ்விழாவில் கலந்து கொண்டு பேசிய போதே முதல்வர் இந்தத் தகவல்களை வெளியிட்டார்.

மாமல்லன் நீர்த்தேக்கம்: சென்னையின் 6-வது குடிநீர் ஆதாரம்

ஏற்கனவே பூண்டி, புழல், சோழவரம், செம்பரம்பாக்கம், கண்ணன்கோட்டை-தேர்வாய்கண்டிகை ஆகிய 5 நீர்த்தேக்கங்கள் சென்னை மக்களின் தாகத்தைத் தீர்த்து வருகின்றன. அந்த வரிசையில் தற்போது 6-வது நீர்த்தேக்கமாக்க இணைகிறது இந்த 'மாமல்லன் நீர்த்தேக்கம்'.

அமைவிடம்: கிழக்கு கடற்கரை சாலை (ECR), நெம்மேலி அருகே.
மதிப்பீடு: ரூ. 342.60 கோடி.
கொள்ளளவு: 1.65 டி.எம்.சி (TMC).
பயன்பெறுவோர்: சோழிங்கநல்லூர், மேடவாக்கம், சிறுசேரி, பள்ளிக்கரணை, திருப்போரூர் உள்ளிட்ட தென் சென்னை புறநகர் பகுதிகளில் வசிக்கும் சுமார் 13 லட்சம் மக்கள் இதன் மூலம் பயன் பெறுவார்கள்.
சிறப்பு: பல்லவ மன்னன் நரசிம்மவர்மன் நினைவாக இதற்கு 'மாமல்லன் நீர்த்தேக்கம்' என்று பெயர் சூட்டப்பட்டுள்ளது.

"43 அணைகள் - இதுதான் வரலாறு!"

விழாவில் பேசிய முதல்வர், எதிர்க்கட்சிகளின் விமர்சனங்களுக்குப் புள்ளிவிவரங்களுடன் பதிலளித்தார். "கலைஞர் கருணாநிதி தலைமையிலான திமுக அரசு அமைந்த 1967 முதல் 2011 வரையிலான காலக்கட்டத்தில் மட்டும் தமிழகத்தில் 43 அணைகள் கட்டப்பட்டுள்ளன" என்று பெருமிதத்துடன் கூறினார்.

அவர் வாசித்த பட்டியலில் இடம்பெற்ற சில முக்கிய அணைகள்:

"சிற்றாறு-1, சிற்றாறு-2, உப்பாறு, சோலையாறு, பொன்னணியாறு, இராமநதி, கருப்பாநதி, குண்டேரிப்பள்ளம், வரதமாநதி, பாலாறு-பொருந்தலாறு, வரட்டுப்பள்ளம்..." என நீண்ட பட்டியலை அவர் வாசித்தபோது அரங்கம் அதிர்ந்தது.

"நிதி மேலாண்மையை (Financial Management) விட நீர் மேலாண்மை (Water Management) மிக முக்கியமானது. அதை உணர்ந்து செயல்படும் அரசுதான் இந்த திராவிட மாடல் அரசு," என்று முதல்வர் அழுத்தமாகக் குறிப்பித்தார்.

விவசாயிகளுக்கு முதல்வர் அளித்த உறுதி

தற்போதைய ஆட்சியின் சாதனைகளையும் முதல்வர் பட்டியலிட்டார்:

கடந்த 5 ஆண்டுகளாகக் காவிரி டெல்டா பாசனத்திற்காக மேட்டூர் அணை குறித்த நேரத்தில் திறக்கப்பட்டுள்ளது.
ரூ. 459 கோடி மதிப்பீட்டில் காவிரி டெல்டா பகுதிகளில் தூர்வாரும் பணிகள் மேற்கொள்ளப்பட்டுள்ளன.
மாநிலம் முழுவதும் புதிதாக 121 தடுப்பணைகள் (Check dams) மற்றும் 63 அணைக்கட்டுகள் கட்டும் பணிகள் நடைபெற்று வருகின்றன.

துணை முதல்வர் மற்றும் அமைச்சர்கள் பங்கேற்பு

இந்நிகழ்ச்சியில் துணை முதலமைச்சர் உதயநிதி ஸ்டாலின், நீர்வளத்துறை அமைச்சர் துரைமுருகன், பொதுப்பணிகள் துறை அமைச்சர் எ.வ. வேலு, குறு, சிறு மற்றும் நடுத்தரத் தொழில் நிறுவனங்கள் துறை அமைச்சர் தா.மோ. அன்பரசன் மற்றும் உயர் அதிகாரிகள் கலந்து கொண்டனர்.