"பாட்டெல்லாம் பாடுனீங்களே.. இப்ப என்னாச்சு?" - முதல்வர் விஜயை வெளுத்து வாங்கிய செந்தில் பாலாஜி!

"மேடையில ஏறி பாட்டெல்லாம் பாடுனீங்க.. இப்ப என்னாச்சு?" – முதல்வர் விஜயை வறுத்தெடுத்த செந்தில் பாலாஜி!

தமிழகத்தில் தவெக ஆட்சிப் பொறுப்பேற்று ஒரு மாத காலம் நிறைவடைய உள்ள சூழலில், ஆளுங்கட்சியான தவெக-விற்கும் எதிர்க்கட்சியான திமுக-விற்கும் இடையேயான அரசியல் மோதல் நாளுக்கு நாள் தீவிரமடைந்து வருகிறது. இந்நிலையில், கோவையில் செய்தியாளர்களைச் சந்தித்த திமுக நிர்வாகியும் முன்னாள் அமைச்சருமான செந்தில் பாலாஜி, முதலமைச்சர் விஜய் மற்றும் அவரது அமைச்சரவையை மிகக் கடுமையான வார்த்தைகளால் விமர்சித்துள்ளார். தற்போதைய அரசு மக்கள் நலனில் அக்கறை காட்டாமல், வெறும் "ரீல்ஸ்" மோகத்தில் வெற்று கவர்ச்சி அரசியல் நடத்துவதாக அவர் குற்றம் சாட்டியுள்ளார்.

இது மக்கள் ஆட்சியா? இல்லை 'ரீல்ஸ்' ஆட்சியா?

செய்தியாளர்கள் சந்திப்பில் பேசிய செந்தில் பாலாஜி, தற்போதைய தவெக அரசை "ரீல்ஸ் ஆட்சி" என்று வர்ணித்தார். "மாற்றங்கள் கொண்டு வரப்போகிறோம் என்று கூறி, மக்களை ஏமாற்றி, வெற்று கவர்ச்சி அரசியலால் வாக்குகளைப் பெற்றுள்ளனர். ஆனால், ஆட்சிக்கு வந்த பிறகும் முதலமைச்சரும் சரி, அவரது அமைச்சர்களும் சரி, இன்னும் அந்த சோசியல் மீடியா ரீல்ஸ் மோகத்திலிருந்து வெளியே வரவில்லை" என்று சாடினார்.

மேலும், "திரைப்படங்களில் வேண்டுமானால் உணர்ச்சிப்பூர்வமாக வசனங்கள் பேசலாம், கைதட்டல் வாங்கலாம். ஆனால், ஒரு மாநிலத்தின் முதலமைச்சராகப் பொறுப்பேற்ற பிறகு, மக்களின் அவசரத் தேவைகள் என்ன, அவசியம் செய்ய வேண்டிய பணிகள் என்ன என்பதை உணர்ந்து செயல்பட வேண்டும். அதை விடுத்து, எந்நேரமும் திமுக மீது குற்றச்சாட்டுகளைச் சுமத்துவதையே முழுநேர வேலையாக தவெக அரசு செய்து வருகிறது" என்றார்.

2021 திமுக ஆட்சியின் சான்றுகளை ஒப்பிட்ட செந்தில் பாலாஜி

தவெக அரசின் நிர்வாகக் குறைபாட்டைச் சுட்டிக்காட்டிய அவர், கடந்த 2021-ஆம் ஆண்டு மு.க.ஸ்டாலின் அவர்கள் முதலமைச்சராகப் பொறுப்பேற்ற காலத்தை ஒப்பிட்டுக் காட்டினார். "எங்களுடைய கழகத் தலைவர் 2021-ல் ஆட்சிப் பொறுப்பேற்றபோது, தமிழ்நாடு மிக மோசமான கொரோனா பெருந்தொற்றுச் சூழலில் இருந்தது. அவர் பதவி ஏற்பதற்கு முன்பாகவே, அதிகாரிகளை நேரில் அழைத்து ஆலோசனைக் கூட்டங்களை நடத்தி, போர்க்கால அடிப்படையில் நடவடிக்கை எடுத்தார். அதன் மூலம் லட்சக்கணக்கான தமிழ்நாட்டு மக்களின் உயிர்கள் காப்பாற்றப்பட்டன. ஆனால், தற்போதைய புதிய அரசோ, துறை சார்ந்த ஆய்வுக் கூட்டங்களை நடத்திக் கொள்கைகளை வகுப்பதில் கவனம் செலுத்தாமல், வெறும் நன்றி அறிவிப்புக் கூட்டங்களில் திமுக-வை வசைபாடுவதையே குறியாகக் கொண்டுள்ளது" என்று பேசினார்.

விவசாயக் கடன் தள்ளுபடி: மக்களை ஏமாற்றிய தவெக அரசு?

தேர்தல் வாக்குறுதிகளை நிறைவேற்றுவதில் தவெக அரசு இரட்டை வேடம் போடுவதாகக் குறிப்பிட்ட செந்தில் பாலாஜி, விவசாயக் கடன் தள்ளுபடி விவகாரத்தை முக்கியமாகப் பிரஸ்தாபித்தார்.

"தேர்தலுக்கு முன்பாக, 5 ஏக்கருக்குக் கீழ் நிலம் வைத்துள்ள அனைத்து விவசாயிகளின் கடன்களும் முழுமையாகத் தள்ளுபடி செய்யப்படும் என்று தவெக வாக்குறுதி அளித்தது. ஆனால், தற்போது 14 லட்சம் விவசாயிகள் பயனடைந்திருப்பதாகப் பொதுவான ஒரு கணக்கைக் காட்டி, 50,000 ரூபாய்க்குக் கீழ் கடன் வாங்கியவர்களுக்கு மட்டும்தான் முழுமையான தள்ளுபடி என்று புதிய நிபந்தனையை விதித்துள்ளனர். 2025-லேயே இதற்கான ரிசர்வ் வங்கி வழிகாட்டுதல்கள் வந்துவிட்டன என்று எம்பி அண்ணன் ஆ.ராசா மிகத் தெளிவாக விளக்கியுள்ளார். ரிசர்வ் வங்கியின் விதிமுறைகள் தெரிந்தே மக்களை ஏமாற்ற வாக்குறுதி கொடுத்தார்களா, அல்லது எதுவும் தெரியாமல் கொடுத்தார்களா? இதில் எந்தவொரு வெளிப்படைத்தன்மையும் இல்லை" என அடுக்கடுக்கான குற்றச்சாட்டுகளை முன்வைத்தார்.

மின்வெட்டுப் போராட்டங்களும், அமைச்சரின் பதில்களும்

தமிழ்நாட்டின் தற்போதைய மின்சார நிலைமை குறித்தும் செந்தில் பாலாஜி கவலை தெரிவித்தார். "திமுக ஆட்சிக் காலத்தில் தமிழகம் மின்வெட்டே இல்லாத, தடையற்ற மின்சாரத்தை வழங்கும் மாநிலமாகத் திகழ்ந்தது. ஆனால், இன்று மாநிலத்தின் பல்வேறு மாவட்டங்களில் மின்வெட்டு காரணமாக மக்கள் வீதிக்கு வந்து போராடத் தொடங்கியுள்ளனர். மின்துறை அமைச்சர் துறை ரீதியான ஆய்வுகளை மேற்கொண்டு இதனைச் சரி செய்ய வேண்டும். அதை விடுத்து, 'நாங்கள் பொறுப்பேற்கும்போது மின்சாரத்துறை ஒன்றரை லட்சம் கோடி கடனில் இருந்தது' என்று பழைய பல்லவியைப் பாடித் தப்பிக்கப் பார்க்கிறார். கடன் மற்றும் அதற்கான வட்டி விவரங்களை நாங்கள் ஏற்கனவே சட்டமன்றத்தில் தெளிவாக விளக்கியுள்ளோம். கடனைக் காரணம்காட்டி மக்களின் அத்தியாவசியத் தேவையைப் புறக்கணிக்கக் கூடாது" என்றார்.

மேலும், "மின்சார வாரியத்தின் புதிய புகார் எண்ணாக தவெக மின்துறை அமைச்சர் அறிவித்திருப்பது, கடந்த 2021-லேயே எங்களது முதலமைச்சரால் தொடங்கப்பட்ட 'மின்னகம்' சேவைதான். அதை இப்போதே புதிதாகத் தொடங்கியது போலப் படம் காட்டுகிறார்கள்" என்றும் கிண்டலடித்தார்.

டாஸ்மாக் மற்றும் போதைப்பொருள் ஒழிப்புச் சவால்

எதிர்க்கட்சியாக இருந்தபோது தவெகவினர் டாஸ்மாக் கடைகளுக்கு எதிராகப் பாட்டுப் பாடிப் போராடியதை செந்தில் பாலாஜி சுட்டிக்காட்டினார். "அன்று தேர்தல் வாக்குகளைப் பெறுவதற்காக வண்டி மேலே ஏறி நின்று டாஸ்மாக் நிர்வாகத்திற்கு எதிராகப் பாட்டெல்லாம் பாடினார்களே, இப்ப என்னாச்சு? தற்போதைய தவெக மின்துறை மற்றும் டாஸ்மாக் அமைச்சர், நாங்கள் முன்பு சொன்ன அதே விளக்கங்களைத் தான் இப்போது சோசியல் மீடியாவிலும், செய்தியாளர்களிடமும் கூறி வருகிறார். அப்படியென்றால், அன்று நீங்கள் அரசியல் ஆதாயத்திற்காக அவதூறு பரப்பினீர்களா என்று பொதுமக்கள் சமூக வலைத்தளங்களில் கேள்வி எழுப்பி வருகிறார்கள்" என்றார்.

அதேபோல், கோவையில் போதைப்பொருள் புழக்கம் அதிகரித்துள்ளதாகத் தவெக தரப்பில் கூறப்படும் விமர்சனங்களுக்குப் பதிலளித்த அவர், "எந்தெந்த மாநிலங்கள் வழியாகப் போதைப்பொருட்கள் இந்தியாவிற்குள் வருகின்றன, தமிழகத்தில் எவ்வளவு வழக்குகளை திமுக அரசு பதிவு செய்து நடவடிக்கை எடுத்தது என்பதைப் பலமுறை சட்டமன்றத்தில் விளக்கியுள்ளோம். தேர்தல் முடிந்து ஒரு மாத காலம் ஆகப்போகிறது, இந்த ஒரு மாதத்தில் போதைப்பொருளைக் கட்டுப்படுத்த தவெக அரசு எடுத்த புதிய முன்னெடுப்புகள் என்ன? ஒரே நாளில் எதையும் மாற்றிவிட முடியாது என்று திருச்சியில் முதலமைச்சர் விஜய் பேசுகிறார். நீங்கள் நடவடிக்கை எடுத்திருந்தால் அதன் புள்ளிவிவரங்களை மக்களிடம் காட்டுங்கள், அதை விடுத்துப் பழைய அரசைக் குறை சொல்வதை நிறுத்திக் கொள்ளுங்கள்" என்று சவால் விடுத்தார்.

தொழில்துறையை வளர்க்கப் போவது ரீல்ஸ் மூலமாவா?

திமுக ஆட்சியில் முதலீட்டாளர் மாநாடுகள் மற்றும் வெளிநாட்டுப் பயணங்கள் மூலம் பல்லாயிரக்கணக்கான கோடி ரூபாய் முதலீடுகளும், இரட்டை இலக்கு பொருளாதார வளர்ச்சியும் எட்டப்பட்டதாகக் குறிப்பிட்ட செந்தில் பாலாஜி, தற்போதைய தொழில்துறை அமைச்சரின் செயல்பாடுகளை விமர்சித்தார். "தற்போதைய தொழில்துறை அமைச்சர் ரீல்ஸ் வீடியோக்கள் போட்டு முதலீட்டாளர்களை அழைக்கிறார். கொஞ்ச நாள் பொறுத்திருந்து பார்ப்போம், இந்த ரீல்ஸ் மூலமாகத் தமிழ்நாட்டிற்கு எத்தனை ஒப்பந்தங்கள் வரப்போகின்றன, எத்தனை ஆயிரம் கோடி முதலீடுகள் கிடைக்கப் போகின்றன, எவ்வளவு இளைஞர்களுக்கு வேலைவாய்ப்பு கிடைக்கப் போகிறது என்பதைப் பொறுத்திருந்து பார்ப்போம்" என்று தனது பேட்டியை நிறைவு செய்தார்.

எதிர்க்கட்சியாகத் தவெக அரசின் தவறுகளைச் சுட்டிக்காட்டுவது திமுக-வின் கடமை என்றும், சட்டமன்றத்தில் உதயநிதி ஸ்டாலின் அவர்கள் குறிப்பிட்டது போலத் தவெக அரசு வாக்குறுதிகளை நிறைவேற்ற அதிகக் காலம் எடுத்துக் கொள்ளாமல் உடனடியாகச் செயல்பட வேண்டும் என்றும் செந்தில் பாலாஜி வலியுறுத்தியுள்ளார்.