மாறும் மனப்பான்மை: இன்றைய பெண்கள் & திருமண எதிர்பார்ப்புகள்

சென்னையில் ஒரு மேரேஜ் மேட்சிங் சென்டர் நடத்தி வரும் நண்பர் பகிர்ந்த தகவல்கள் சமூகத்தில் நடைபெற்று வரும் அமைதியான மாற்றங்களை வெளிச்சம் போட்டு காட்டுகின்றன. கடந்த 14 ஆண்டுகளாக பெற்றோர்களை நேரடியாக அலுவலகத்திற்கு வரச் செய்து பதிவு செய்யும் முறையை கடுமையாக பின்பற்றிவரும் அவர், இன்றைய இளம் பெண்களின் திருமண மனப்பான்மை எவ்வாறு மாறியுள்ளது என்பதை பல உதாரணங்களுடன் விளக்குகிறார்.

“குக் லீவு போட்டா நான் ஏன் செய்யணும்?”

சமீபத்தில் தன் மகளுக்காக பதிவு செய்ய வந்த ஒரு தாய் பகிர்ந்த சம்பவம் சிந்திக்க வைக்கும். நிச்சயிக்கப்பட்ட திருமணம், நான்கு மாதங்களில் நடைபெறவிருந்த நிலையில், தொலைபேசியில் பேசிக்கொண்டிருந்தபோது ஏற்பட்ட ஒரு உரையாடல் காரணமாக நிறுத்தப்பட்டது.

பெண் கேட்ட கேள்வி: “வீட்டில் குக் இருக்கானா?”
பையன் பதில்: “குக் இருக்காங்க. ஆனா அவ லீவு போட்டா நீ ஏதாவது செய்யறாப்லே இருக்கும்.”

இந்தச் சிறிய பதில் பெண்ணுக்கு ஏற்றதாகத் தோன்றவில்லை. “நான் இவ்வளவு சம்பாதிக்கிறேன். குக் லீவு போட்டா என் அம்மா பார்த்துக்குவாங்கன்னு சொல்ல வேண்டியதுதானே? நான் ஏன் செய்யணும்?” என்ற கேள்வி அவளிடம் எழுந்தது.

இந்தச் சம்பவம் ஒரு பெரிய மனநிலை மாற்றத்தைக் காட்டுகிறது. வேலை பார்க்கும் பெண், வீட்டுப் பொறுப்பை தன்னுடைய இயல்பான கடமையாக ஏற்கத் தயங்குகிறாள். இது தவறா? சரியா? என்பது விட, இது ஒரு மாற்றம் என்பதை புரிந்து கொள்ள வேண்டும்.

“I Want My Space”

32 வயது பெண் ஒருவர், ஜாதகம் பொருந்திய பையனுடன் பேசிய அனுபவத்தை பகிர்ந்தார். “நேத்து நான் மூவி போனேன்னு சொன்னேன். ‘யார் கூட போனே?’ன்னு கேட்டான். இந்த மாதிரி கேட்கக் கூடாதுங்கிற மேனர்ஸ் கூட தெரியலே. I want my space,” என்றாள்.

இங்கு முக்கியமானது ‘ஸ்பேஸ்’ என்ற கருத்து. இன்றைய பெண்கள் தனிப்பட்ட இடத்தை மிகவும் மதிக்கிறார்கள். உறவு என்றால் கட்டுப்பாடு அல்ல; புரிதல் என்று அவர்கள் கருதுகிறார்கள்.

“எனக்கு காம்ப்ரமைஸ் பிடிக்காது”

“எனக்கு லைஃப்லேயே பிடிக்காத வார்த்தை காம்ப்ரமைஸ்,” என்று 30 வயதைக் கடந்த பெண் ஒருவர் கூறியிருக்கிறார். இதேபோல, “எங்க பொண்ணு அட்ஜஸ்டபிள் டைப் இல்ல” என்று நேரடியாகச் சொல்லும் பெற்றோர்களும் உள்ளனர்.

இது சுயமரியாதையா? இல்லாமல் போன பொறுமையா?
இன்றைய தலைமுறை உறவை சமநிலையாக பார்க்க விரும்புகிறது. ஆனால் உறவின் அடிப்படை அம்சமான ‘ஒத்துழைப்பு’ மற்றும் ‘விட்டுக்கொடுத்தல்’ குறைந்து வருகிறதா என்ற கேள்வியும் எழுகிறது.

சுயநிலை – பாதுகாப்பு – தாமதமான திருமணம்

“முதலில் எனக்கான ஒரு செக்யூரிட்டி வேண்டும். அதன் பிறகுதான் கல்யாணம்,” என்று பல பெண்கள் கூறுகின்றனர். ஒரு ஃப்ளாட் பதிவு செய்து, கடன் முடித்து, தொழிலில் நிலைநிறுத்திக் கொண்டு பிறகே திருமணம் என்று திட்டமிடுகின்றனர்.

இது பொருளாதார சுயநிலையை முன்னிறுத்தும் அணுகுமுறை. இது நல்ல மாற்றம்தான். ஆனால் தாமதமான திருமணத்தின் சில விளைவுகளும் உள்ளன:

பெற்றோரின் வயது அதிகரித்தல்
உடல் நலக் குறைபாடுகள்
கருத்தரிக்க வேண்டிய வயதைத் தாண்டி சிக்கல்கள்
மருத்துவச் செலவுகள் மற்றும் மன அழுத்தம்

இதுபோன்ற காரணிகள் குடும்பத்தையும் பாதிக்கின்றன.

பெற்றோரின் மாறும் மனநிலை

முன்பு “25 வயசாச்சே, கல்யாணம் பண்ணணும்” என்று கவலைப்பட்ட பெற்றோர், இன்று 29–30 ஆனாலும் வற்புறுத்தத் தயங்குகின்றனர். சிலர் “இன்னும் கொஞ்சம் இருக்கட்டும்” என்று கூறுகின்றனர்.

இதன் பின்னணியில் இரண்டு காரணங்கள்:

பெண் சுயமாக நிற்க வேண்டும் என்ற விருப்பம்
திருமணத்தில் தோல்வி ஏற்படக் கூடும் என்ற பயம்

“இது நிச்சயம் வெற்றிகரமான திருமணம்” என்ற நம்பிக்கை குறைந்து வருவது கவலைக்குரியது.

தேர்வு செய்யும் முறை – மாற்றமா? அளவுக்கு மீறிய எதிர்பார்ப்பா?

“ஹைட் 2 இன்ச் கூடுதலா இருக்கணும். கலர் கொஞ்சம் பத்தாது.”
திரைப்பட ஹீரோ தேர்வு செய்வது போல வாழ்க்கைத் துணையைத் தேர்வு செய்வது சமூகத்தில் அதிகரித்து வருகிறது.

நல்ல கல்வி, நல்ல வேலை, நல்ல குடும்ப பின்னணி போன்ற அடிப்படை அம்சங்கள் இருந்தாலும், சிறு காரணங்களுக்காக மறுக்கும் மனநிலை அதிகரித்துள்ளது.

மேலும், “பேரண்ட்ஸ் கூட இருந்தா சரியா வராது” என்ற எண்ணமும் சிலரிடம் காணப்படுகிறது. ஆனால் ஒரு நல்ல மனிதரை உருவாக்கிய பெற்றோர்களின் தியாகத்தை மறந்து விடுவது ஒரு அடிப்படை உண்மையைப் புறக்கணிப்பதாகும்.